Oil leh buhfai man tihsan avangin mipui an khawngaihthlak - K Auva

MNF party chuan nimin khan Mizo Hnam Rûnah chhung inkhawm an nei a; thusawitu K Vanlalauva, MNF NCC member chuan, tuialhthei man tihsan leh buhfai man tihsan avangin mipui an khawngaih-thlak hle niin a sawi.

K Vanlalauva chuan, "Oil man tihsan a nih avang leh buhfai man tihsan a nih avangin mipui an khawngaihthlakin an phun nasa hle a, thil dang man pawh a san phah zel. He sorkar hian ran ang maiin mipui min enkawl a ni tawh ber," a ti.

Finfiahna neih hmaa thutlukna siamin mipui a tibuai ṭhin tih sawiin Vanlalauva chuan, "Sorkar hmasate khan an ti ngai lo. Sorkar kal tawhte'n kum 5 hnuah engtin nge kan awm ang tiin ngaihtuahna kan hmang hmasa ṭhin a, chutianga ngaihtuahna sêng lo tan kum 5 bak sorkar a har," a ti a; ZPM kaihhruai sorkar chu an tih dik lohte siamṭhat hna thawk turin a ngen.

K Vanlalauva chuan, sorkar hmasain Mizoram Subordinate Staff Selection Board a din chu thawktute beráwn hmasa loin ZPM sorkarin a ṭhiah thu te, MNF sorkarin higher secondary school 12 leh high school 120 a dinte chu ZPM sorkarin an sût thu leh, middle school 48 adhoc grant-in-aid dinhmuna hlan kai pawh an ṭhiah thu a sawi bawk.