Sorkar hmasate hun laiin SHC-in ngaihthah a hlawh - Prof. Nilawma

Minister of state Prof. Lalnilawma chu nimin khan Sinlung Hills Council inthlan atan campaign-in Zohmun, Palsang leh Mauchàr tlangdung a fang a, SHC mipuiin sorkar hmasate hun laiin ngaihsak an hlawh tâwk loa a hriat thu leh ZPM-in tihhmasawn an duh thu a sawi.

Prof. Lalnilawma chuan, SHC inthlan atan campaign-in hmar tlangdung khaw hrang hrang a fang tawh tih sawiin, "Kan fanna aṭanga ka hmuh chhuah chu, he tlangdungah hian hmasawnna a tla rual lo a, sorkar hmasate hun lai khan he tlangdung hian ngaihthah a hlawh deuh niin a lang," a ti.

SHC huam chhunga khua leh mipuite chu state ruling bial ni tura a duhsak thu sawiin Lalnilawma chuan, "ZPM-in sorkarna kan han chan ve tâkah chuan he tlangdungah hian hmasawnna tluantling thlentu nih kan duh a, SHC mipui tan sorkar hriatreng tlak leh ṭhangthar zelte tana hmasawnna ro tling thlentu nih kan duh," a ti a; tunah opposition MLA bial ni mah se, hmasawnna a kal tluan theih nan ruling bial nih tum turin a chah.

Prof. Lalnilawma chuan, ZPM-in sem policy an zuar lo tih sawiin, "Kut hnathawh kawnga in taimakzia ka hmu hian ZPM policy Bána Kaih scheme hlawhtlinpui tlak leh khai chhuah tlak tlangdung in niin ka hria. ZPM leh HPC-te'n candidate kan rawn thlante hi hnehna sang tak lo pe turin ka sáwm che u a ni," a ti.