Hâlpuah tel loa Diwali lawm vângin lawm

ZPM party chuan nimin khan thuchhuah siamin, sorkar thuchhuak zâwma Mizorama Diwali hmangtute'n hâlpuah leh hâlmawi tel loa an lawm chu lawmawm an tih thu an tarlang.

ZPM chuan, hunpui lawm nana hâlpuah leh hâlmawi hman ṭhinin mipui tan harsatna nasa tak a thlen ṭhin avangin Mizoram sorkarin khapna thupek a chhuah tih tarlangin, "Thuchhuah zâwma hâlpuah leh hâlmawi tel loa Diwali hmangtute hnenah lawmthu kan sawi a. Hetianga hma latu Home minister Pu K Sapdanga leh Home department-a thawktute chungah lawmthu kan sawi a ni," an ti.

ZPM chuan, "Hâlpuah leh hâlmawi hian thil ṭha thlen a neih loh avang leh nghawng ṭha lo hlir a neih avangin kalphung thar, mipui sorkar chuan a ngaimawh a, mipuite'n thlamuang taka hunpui an hman theih nan khapna thuchhuah a siam ta a ni," an ti a; Krismas leh kumthar lawm hunah pawh sorkar thuchhuak leh ngenna zâwm turin mi tin an ngen a ni.