Police-in mobile phone bo an hmuh lêtte a neitute an pe lêt

Lunglei Police Station-a Cyber Cell chuan mobile phone bo leh rûk report an dawn, an hmuh lêt tawhte chu nimin khan a neitute hnenah an pe lêt.

Mobile phone inhlanna hun hi Lunglei PS-ah buatsaih a ni a; mobile phone a neitute hnena an pek lêtte chu September leh October, 2024 chhunga Lunglei police-in report an dawn phone 28 niin, cheng nuai 5.73 hûa chhût a ni.

Lunglei additional SP K Beihmotaosa chuan, "Mobile phone bo hi a tibotute tan uiawm tak a ni. Lunglei police-te chuan tê lua awm loin, mobile phone tibo report awm tawh phawt chu a tam thei ang ber theihtawpin chhui chhuahsak zel kan tum," a ti.

Lunglei Addl. SP chuan, mobile phone bo rinhlelhawm tih hre reng chunga lo leisaktu emaw, lo thlengtute emaw chungah action an la zel dawn tih a sawi a; phone bo leh rûk lo leitu man an neih nual tawh thu a sawi bawk.