Tobacco free village-ah puan tum

Health & Family Welfare de-partment chuan Tobacco Free Youth Campaign 2.0 hmangin Aizawl district-a khaw pahnih - Phulpui leh Muthi chu tobacco free village-ah puan tumin hma an la mek.

Tobacco free village puan tumna bawhzuiin National Tobacco Control Programme hotute chuan nimin khan Phul-puiah awareness programme an buatsaih a, khawtlang hruaitute nen tobacco free village nih theih dan tur an sawiho. October 15, 2024 khan Muthi-ah awareness meeting neih a lo ni tawh bawk.

Ministry of Health & Family Welfare hmalaknain September 24, 2024 khan Union HFW minister of state Prataprao Jadhav chuan ‘Tobacco Free Youth Campaign 2.0’ a lo hawng tawh a; Campaign hi ni 60 chhung awh tura duan niin, ṭhalaite vaihlo zûk leh hmuam laka an fihlim theihna tura hmalakna tur a ni.

HFW department tarlan danin, Tobacco Free Youth Campaign 2.0 hmang hian a tam thei ang ber tobacco free village siam tur a ni a, NTCP awmna district-ah chuan khaw pakhat ṭheuh tala hma la turin thupek chhuah a ni. Tobacco free village tih hian khua/veng chu vaihlo zûk leh hmuam ti awm lohnaa siam lam a kâwk lo a, vaihlo khuahkhirhna dan zawm ṭhat leh ṭhat loh chu tehna pawimawh ber pakhat a ni ang.

TOBACCO FREE VILLAGE KALPHUNG

* Village level coordination committee din

* Tobacco free village huam chhunga puipunna hmun (public place) hrang hrangah vaihlo hman/tih loh tur.

* Tobacco free village chhunga vaihlo aṭanga thil siam hrang hrang zawrhna dawrahte kum 18 hnuai lam hnenah vaihlo aṭanga siam hralh loh leh dawrah khapna thu chuanna board/signage tar vek tur.

* Tobacco free village chhunga zirna-in zawng zawngah Tobacco Free Educational Institution kaihhruaina dan zawm tur.