KHAWTHLIR

Lunglei-Tlabung inkara Phairuangkai leiin a dâwl zawh chin chu ton 12 a nih thu Lunglei DC chuan a tarlang a; leiin a dâwl zawh tâwk aia rit phur lirthei tlân phal a nih loh thu leh, PWD (Highways)-in ton 35-a rit dâwl zo tura hma an lak mek thu a tarlang bawk.

Nimin zing dar 4 vel khan Piler khuaa Lal­chhawra s/o Dengdawla (L) Assam type in chu a kâng a, bungrua chuh hman lohin a kâng ral. Mihring thi leh hliam an awm lo a, pawisa cheng sing sarih vel a kan bakah, ar note 15 leh ui pakhat an kang hlum. Kàngmei chhuah chhan hriat chian a ni lo a, in hnuai ar-ina electric current line aṭanga chhuak nia hriat a ni.

Mizoram Police din champha lawmna pualin Kolasib police-te chuan nimin khan SP Office-ah blood donation camp an huaihawt a,  Kolasib District Hospital tan thisen unit 26 an pe a, petute mipa 23 leh hmeichhia pathum an ni.

Electric Veng VDP-te chuan January 20 khan an vengah lirthei pa­khat aṭangin sapzu um puitling case 12 (um 144) an man a, zute hi nimin khan an leih bua. Zu hi tualchhunga hralh­na rate ang chuan Rs. 1,63,000 man a ni.

PWD-in vawiin aṭanga February 4, 2020 thlengin Tlak lui aṭanga Ramhlun Industry péng thleng kawngpui thawm ṭhat hna an thawk dawn a, hna thawh chhungin lirthei tan kawngpui khâr a nih dawn bakah, hnathawh tibuai thei tura kawngpui síra lirthei leh bungrua dah phal a ni lo. 

Local Administration (LAD) minister K Lalrinliana chuan nimin khan LAD pisaah Mizorama village council 25 hnenah Rashtriya Gram Swaraj Abhiyan (RGSA) scheme aṭanga pek computer pakhat ṭheuh a hlan; RGSA hnuaiah LAD chuan Mizorama V/C zawng zawng hnenah computer pek tumin hma a la a ni.

Lunglei DC thar V Lalsangliana chuan nimin khan a pisaah Lunglei district MJA member-te a kâwm a, district hmasawnna tura hma-lakna hrang hrang a sawipui a; Bawrhsap chuan, MJA-te chu Lunglei district hmasawnna turin thawhpuiah a sáwm.