CM-in UN agency-te office a hawng

Mizoram sorkar leh UNO project in-ṭawm, UN Joint Initiative Project atana thawktu UN agency pali - Food and Agriculture Organisation (FAO), International Labour Organisation (ILO), UN Development Programme (UNDP) leh United Nations Industrial Development Organization (UNIDO)-te office tur, AH&Vety directorate building-a mi chu nimin khan chief minister Lal Thanhawla'n a hawng.

Chief Minister chuan, Mizo mipui tan Mizoram sorkarin UN team-te nen thawkho­in ei leh bara intodelhna, ran vulh leh thil dangah hmasawnna a thlen ngei a beisei thu a sawiin, "UN mithiamte hmalakna tur hi nghakhlel takin kan thlir a, sorkarin theih­tawpin an hnathawhnaah a ṭul ang angin a pui ang," a ti a; Mizoram sorkar leh UNO an thawkho chu lawmawm a tih thu a sawi.
UNO hotu Louise Georges chuan, Mizoram chu India ram kilkhawr bera awm ni mah se, ram nuam, ralmuang leh boruak thiang­hlim tak a nih thu a sawi a, "Mizoramin hma a sawn theihna atan UN agency-te'n hna an thawk dawn. Mizoram hi a nawm bakah, ziak leh chhiar thiam tehnaah India rama sang ber pakhat a nih avangin hmalak pawh a châkawm lehzual a ni," a ti.
Joint UN Initiative Project atan hian Mizoram sorkar leh UN agency pali - FAO, ILO, UNDP leh UNIDO-te chuan October 16, 2014-ah inremna thuthlung an ziak a ni.
Mizoram sorkar leh UN agency-te hian Mizoram eco-system vawnhimna tura rua­hmanna ṭha zawk buatsaih te, agriculture leh horticulture thlai bakah, ramhnuai thil thar chhuah thenkhat hralhna tura zawn te, eizawnna kawng hawn belh tura kut hnathawktute training pek leh an thiamna chher hriam sak kawngahte hma la dun turin inremna an ziak a ni.
Sorkar thuchhuah tarlan dan­in, UN agency palite hian hna thawhna atan Rs. 25,58,40,000 (US dollar 40,00,000) an thawh dawn a, a ṭul dan azirin an thawh belh zel dawn a ni.