Police leh HPC(D) inkap; HPC(D) 1 thi Operation kan ṭan dawn chauh: CM

Mizoram police-te chuan nimin zing dar 6 vel khan Malsawmkima, HPC(D) chu Ṭiaulian, Manipur-ah an kâp hlum. Amah hi March 28, 2015-a Zokhawthiang dáia Mizoram police pathum kap hlumtute zinga mi a ni.

Hetih lai hian, chief minister Lal Thanhawla chuan HPC(D)-te lakah sorkar­in operation a ṭan dawn chauh thu a sawi.

Mizoram police thu­chhuah tarlan danin, Mizoram hmar lam, Manipur ramri chhehvela Operational Party-te chuan May 7 zan rei tawhah information an dawng a, March 28, 2015-a Zokhawthiang daia inlambunnaa a bul tumtu ber pakhat chu Ṭiaulian khuaah a awm thu an hria.

Mizoram police Operational Party-te chuan an thu dawn bawhzui nghalin, Manipur police leh Assam Rifles-te hriattir an tum a, mahse mobile phone leh inbiakpawhna hmanraw dangte a hman theih loh avangin an hriat­tir thei ta lo a; Mizoram police headquarters pawh an hriattir thei lo.

Operational Party-te chuan nimin zing khawvar hma khan Ṭiaulian an pan a, Ṭiaulianah hian Malsawm­kima leh amah vengtu nen intawngin, an inkâp a, Malsawmkima vengtu hi a tlanbo a ni. Police zingah hliam tuar an awm lo.

Malsawmkima hian .38 luger revolver a hmang a, phe pistol hi March 28-a police an kahhlum ṭuma Assembly Assurance Committee member-te vengtu police-te pistol an chhuhsak nia hriat a ni.

Malsawmkima ruang hi an khua Sakawrdaiah police-te'n nimin tlai dar 4 vel khan an thlenpui a, tihfel ngai hrang hrangte tihfel a nih hnuah a chhungte hnenah pek a ni.
Malsawmkima hi police-ah constable a ni ṭhin a, June 11, 2014 zan khan police silai pahnih nen Sakawrdai post aṭangin a tlanbo a, HPC(D) a zawm a ni.
Tarlan tawh angin, March 28-a HPC(D)-te'n Assembly Assurance Committee member-te leh anmahni zuitute an lambun ṭum khan Malsawmkima hian RL Pianmawia, MLA pawh hmaichhanah a lo be tawh a ni.
Vanglaini palai zawhna chhangin chief minister Lal Thanhawla chuan, HPC (D) laka police-in operation an neih mek chu chawlhsan a nih dawn loh thu a sawi a, "Kan ṭan dawn chauh a ni. Inbiak an duh lo a, min kap a ni," a ti.
Hemi rual hian Chief Minister chuan, HPC(D)-te'n an duh phawt chuan remna siam tura inbiak sorkarin a duh reng tih a sawi a, "Remna duhtute kan ni a, an duh phawt chuan remna atana inbiak kan duh reng a ni," a ti.