KHAWTHLIR

MJA Conference an thlir lâwk
Kolasib-a MJA General Conference 2015 Organising Committee chu nimin khan Kolasib IPRO Pratap Chhetri hoin a pisaah an ṭhukhawm a, MJA conference vawi 42-na an thlen tura inbuatsaihnate an thlirho a, sub-committee hrang hrangte report ngaihthlak a ni. MJA conference hi May 13, 2015-ah Kolasib-a IPR office conference hall-ah neih a ni ang.

Thiin chhar
May 6, 2015 tlai dar 5:30 vel khan Liankima (74) h/o Phirṭhuami, Saitual Dawrkawn chu Saitual tlak lam rama a khanghu huanah thia chhar a ni a, a thih dan hriat a ni lo. Thu dawn danin, Liankima hi a khanghu huanah a feh a, tlaiah a makpain thiin a hmu a ni. Liankima hian a khanghu huana thing nâwite chhep khawmin a hâl a, mei a chhuah avangin mi dangin an ṭhelh a, mahse Lian­kima chu an hmu lo niin an sawi.

Inkâp hlum
May 6 zan tìr lam khan Lallawmkima, Chhawrtui khua chu an ramvahnaah a ramvahpui Vanlalpara'n a kâp palh a, a hmunah a thi. Thu dawn danin anni pahnih hi ramah an riak a, tlai dar 6 velah sa kah tur zawngin an chhuak dun a, inhnaih taka sa an chân dun laiin Vanlalpar­a chuan Lallawmkima chu sa emaw tiin a kâp niin an sawi.

Pass-te lawmpui
Mizo Zirlai Pawl, Mizo Students Union leh Students Self-Support Union-te chuan thu­chhuah siamin, MBSE-in HSSLC Examination 2015 result felfai leh changtlung taka a ti­chhuak ta chu lawmawm a tih thu an tarlang a, MBSE thawkte thawh­rimna fakawm an tih thu an sawi. Zirlai pawlte hian zirlai pass-te chu an lawmpui a, an kal zelna turah duhsakna an hlan.

Inven dan zirtir
Disaster Management & Rehabilitation department leh Central YMA hnuaia Disaster Management Sub-Committee ṭangkawp chuan nimin khan Kolasib YMA sub-headquarters hnuaia branch hrang hrangte tan Diakkawn community hall-ah chhiat­rupna thlen thulha chet lak dan inzirtirna an buatsaih.