ACH-ah Jan Aushadhi Store hawn a ni Sorkar hotute hi intilal tur an ni lo: Thanzara

Aizawl Civil Hospital-a damdawi a man tlawma leina tur dawr, Jan Aushadhi Store (JAS) chu nimin khan Health minister Lal Thanzara'n a hawng.

Lal Thanzara chuan, sorkar hotute chu intilal tur an nih loh thu sawiin, "Sorkar hi mipui siam a nih angin mipuite hamṭhatna a ngaihtuah tur a ni a, he sorkar hian miretheite a chhawm­dawl mek a ni," a ti.

Health Minister chuan, "Kan sorkar hi mirethei lamṭang sorkar a ni," tiin, sorkarin NLUP hmang­a miretheite a chhawmdawl mek angin, hriselna lamah pawh mipui­te an pe turin ṭan a la mek niin a sawi a, Jan Aushadhi Store pawh a chhawr ṭangkai ber tur chu miretheite an nih thu a sawi.

Mimal damdawi dawr ṭhen­khatin Jan Aushadhi Store chu an damdawi a ṭha tawk lo tiin emaw an sawi palh theih thu sawiin, Lal Thanzara chuan, "Damdawi zawrhte hi a ṭha a ni tih finfiah vek a ni," a ti. Damdawi dawr ṭhenkhatte'n Aushadhi Store chu an hman sual theih avangin doctor lehkha tel loa damdawi lei theih loh tura ruahman a nih thu a sawi.

Lal Thanzara chuan, nausen thihna titlem turin nasa lehzuala ṭan a ngaih thu sawiin, "District tina CMO-te'n ṭan la lehzual se, an huam chhungah ṭheuh thawktu zawng zawngte vil ngun lehzual se. Chutianga kan tih chuan infant mortality rate hi 50%-a a tlakhniam ngei a rinawm. IMR-a kan hmingchhiatna hi tihreh kan tum a ni," a ti.

Mizo mipuite'n engineering department - PWD, P&E leh PHE-te chu hlemhletna tamna nia an ngaih ṭhin a nih thu sawiin, Lal Thanzara chuan, "Health departmnent-ah pawh kuttling loa sum lak luh a awm em ni chu tih theih turin mipuiin an ngai niin a lang," a ti a; hlemhletna laka fihlim turin Health department-a thawkte chu a chah. Aizawl Civil Hospital-a thuam ṭhat ngaite chu a tahtawla thuam ṭhat zel a nih thu a sawi bawk.

Report petu Dr Zorammawia chuan, JAS-in a tum ber chu mirethei zawkte'n damdawi ṭha man tlawm zawka an lei theih nan leh mipuite hrisel zawk nan a nih thu a sawi a, JAS-a damdawite hi a man tlawm avangin a quality a chhe chuang lo," a ti.

Dr Zorammawia sawi danin, JAS dawr sakna leh damdawi zawrh turte lei nan Aizawl Civil Hospital RKS sum hman a ni a, Assam type in ft. 12-a zau, ft. 18-a sei sak nan lei bungraw lei nan Rs. 2,50,925 sen a ni. Dawr nghaktu tur mi thar pathum lak an ni a, tun dinhmunah cheng nuai 13 sengin damdawi chi hrang hrang 153 chah thlen tawh a ni.

Dawr hi tunah chuan zing dar 8 aṭanga zan dar 8 thleng an hawng phawt dawn a, dawr hmun nghet tur an peih hun­ah chuan ni khatah darkar 24 chhung hawn tur a ni. Jan Aushadhi chungchang sawitu Dr Biakthansangi chuan, JAS chu district hospital tinah la hawn leh tura ruahman a nih thu a sawi.