Chaw ngheina sawn; badge dum bel dawn

Sorkarin RMSA hnuai­a thawk a bân tak, laboratory attendant leh clerk-te'n an hna ngai thawhtir leh phût­a April 27, 2015 aṭanga chaw an nghei chu an la chhunzawm zel a; an awm khawmna hmun erawh PRISM office aṭangin Mizo Students Union (MSU) office, Vanapa Hall hnuaiah an insawn.

Thu dawn danin, chaw an ngheina PRISM office hi PRISM-in mimal in an luah a ni a, in neitute an chen ve tho avangin, tui leh thil dangah harsatna a awm a; an insawn ta niin thu dawnna chuan a sawi.

Chaw nghei huaihawt­tute zinga an hruaitu, Lalnunzira chuan Vanglaini palai zawhna chhangin, tuna chaw nghei mekte chu mi 20 vel an nih thu a sawi a; chauh vanga damdawi-ina dah luhte chu an chhuak leh tawh.

Hetih lai hian, Mizoram RMSA Employee Welfare Association (MREWA) chuan thu­chhuah siamin, lab. attendant leh clerk-te chu sorkarin chhawr chhunzawm leh se an duh thu an tarlang.

MREWA hian an thawhpui ṭhin harsatna tawk mekte an lainatna leh an chaw nghei mek an thlawpna lantir nan May 11-12, 2015 khian an hnathawhnaah badge dum bel an tum a ni.