CM-in sikul ṭan hma fak

Chief minister Lal Thanhawla chuan School Education department-in sikul kai hun thar an duang chu fakawm a tih thu a sawi a, "Huaisen taka kalphung thar ṭha tak an duang chhuak hi fak tlak an ni," a ti.

Lal Thanhawla hian nimin khan Congress Bhavan-a inkhawmah thu sawiin, zing dar 8-a sikul ṭan dodal an awm chu state dangin Mizote hnam thatchhiaah an ngaih phah ang tih hlauhawm a tih thu a sawi a, "State dangah chuan zing dar 7-ahte an ṭan," tiin sikul kai hun tihhma chu thil ṭha a nih thu a sawi.

Lal Thanhawla chuan, hma thar lak nachang hre lo hruaitu nih a hlauhawm tih sawiin, "Kan hmalakna a ṭha lo a nih chuan kal­phung thar kan rek leh mai tur a ni. Sorkarin kalphung thar a ngaihtuah chhuak zel dawn. A ngai renga ding tur kan ni lo a, hmasawn tur kan ni. Hmasawn tur chuan kalphung thar neih a ngai ṭhin," a ti.