RTI Act essay inelna lawmman hlan

Mizoram Information Commission-in RTI Week 2014 puala 'The Right to Information Act, 2005: Its uses and impacts in Mizoram' tih thupui hmanga essay inziah­siak a buatsaiha tiṭhate hnenah nimin khan MIC office-ah lawmman hlan a ni a, lawmmante chu chief information commissioner Lal Dingliana'n a hlan.

Essay inziahsiak hi Aizawla university leh college zirlaite tana buatsaih a ni. Lawmman latute chu - pakhatna Zothansangi Hmar d/o Rualkhuma Hmar, Mizoram Law College; pahnihna H Lalṭanpuia s/o H Lalzarluaia, Chawnpui, Hrangbana College leh, pathumna R Vanlalruata s/o R Lalmalsawma, Kolasib New Diakkawn, Hrangbana College-te an ni.

CIC Lal Dingliana chuan, RTI Act chu Mizoramah pawh hmang ṭangkaitu an pung ve tial tial tih sawiin, "RTI Act hi tu ta bik mah ni loin, India khua leh tuite chanvo a ni tih hi hrethiam tawhin, thu dik hriat nan an hmang tawh a ni," a ti a; chanchinbu ṭhenkhatte pawhin thu dik hriat nan an hman ṭangkai he tuh a sawi.

Lal Dingliana chuan, RTI Act hmanga zawh kher ngai loin sorkar department leh pawl hrang hrangte'n an nihnate leh an hnathawhte chiang taka an tarlan ngam a ṭul tawh hle tih a sawi a, "RTI Act hmasawnna turin mi zawng zawng kan ṭan rual a ngai a ni," a ti.