Mipuite hamṭhatna dawnna tur Bank scheme thar 3 hawn a ni

India mi zawng zawngte'n bank kaltlanga hamṭhatna an hmuh theihna tur scheme thar pathum chu Inrinni tlai khan Prime Minister Narendra Modi-a'n Kolkata-ah a hawng a; chumi rual chuan Mizoramah pawh Finance minister Lalsawta'n Aijal Club-ah a hawng ve bawk.

Heng scheme thar pathumte hi Pradhan Mantri Suraksha Bima Yojana (PMSBY), Pradhan Mantri Jeevan Jyoti Bima Yojana (PMJJBY) leh Atal Pension Yojana (APY)-te an ni.

Finance Minister chuan, mipuite'n insurance ti duh ṭhin mah se, dinhmunin a zir loh avangin a harsa ṭhin tih sawiin, "PM-in a hawn tak scheme tharah hi chuan a awlsam a, sum tlemtê chauh sen a ngaih vangin sum la lut tlemte tan kawng a hawng dawn a, a pawimawh tak zet a ni," a ti a; scheme tharte chu Mizo mipuiin an chhawr ṭangkai theih nan uar taka puanzar a ṭul thu a sawi.

Khualzahawm, Tourism minister John Rotluangliana pawhin thu sawiin, ruahmanna thar ṭha tak takte chu a taka chang turin bank-a thawktute an pawimawh hle tih a sawi a, "Mihring chuan innghahna ṭha leh rinchhan tur kan mamawh ber a, scheme hawn thar pathum hmang hian bank kaltlangin mi tinin innghahna tlak kan nei thei dawn a ni," a ti.

Scheme thar pathum hawnnaah hian Finance commissioner LN Tochhong, Finance secretary F Vanlalruata leh Mizorama bank hrang hrang hotute an tel a; Minister Lalsawta chuan insurance zawmtu mi 10 hnenah insurance certificate a hlan nghal a ni.

Scheme thar pathumte hi insurance tihna hmanrua vek a ni a, eng bank-ah pawh savings account neitute'n sum tlemtê chawiin insurance an ti thei dawn a ni. Scheme-te hi State Bank of India branch hrang hrangah leh bank dang (Core Banking system nei)-tea savings account neite tan application form laka thehluh theih a ni.