Hna ngai thawh phûttute'n Chaw nghei an titawp

April 1, 2015 aṭanga an hna aṭanga bân tak, RMSA hnuaia laboratory attendant leh clerk-te leh, SCERT-a Guidance and Counselling staff-te'n an hna ngai thawhtir leh phûta April 27, 2015 aṭanga chaw an nghei chu May 9 chhun dar 12 khan an titawp.

Chaw ngheite'n nawrh an tihtawp hma hian RMSA hotute nen inremna an siam a; inremnaah chuan RMSA state project director K Lalthawmmawia leh additional state project director Lalhmachhuana ten hming an ziak a, chaw ngheite aiawhin an convener R Lalzirliana, secretary Lalthlamuana leh treasurer Lalrinzuali ten an hming an ziak bawk.

An inremna chu

RMSA hnuaia laboratory attendant leh office clerk chhawr zui tak lohte hi Central aṭanga an hlawh tur hmuh leh a nih chuan Mizoram sorkarin chhawr zui leh dan a ngaihtuah ang.

An chungchanga Central sorkara theihtawp chhuaha Mizoram sorkarin hma a lak tawhna hi chak takin a chhunzawm zel ang.

Mizoram Rural Bank-a laboratory attendant leh office clerk ten personal loan an lo lak tawh chungchangah RMSA leh MRB ten MoU an lo siam tawh angin hmalak a ni ang.