VC/LC inthlanah thubuai 10 thehlut Election Tribunal-in an chingfel dawn

Village council leh local council inthlan zawh takah lungawi lohna vanga thubuai thehluh 10 an awm a, chungte chu VC-ah pariat leh LC pahnih a ni.

Thubuaite hi Election Tribunal chuan ni 120 chhungin a chingfel tur a ni a, Tribunal-ah hian district pakhatah mi pathum zel an awm dawn a ni.

The Mizoram (Election to village councils) Rules 2013 leh Local Council Rules 2014 Chapter VII (Extract)-in a sawi danin, State Election Commission (SEC)-in thubuai an dawnte chingfel turin Election Tribunal a din dawn a, chairman pakhat leh member dang pahnih ruat tur a ni.

Election Tribunal member-te chuan anmahni district ṭheuha thubuai lutte an ngaihtuah dawn a, Election Tribunal hian an thubuai ngaihtuahah thuneihna tâwp an nei a; an hmuhchhuah chu SEC-ah an thehlut leh dawn a ni. Hna thawh nan ni 120 chhung hun an nei dawn a, mahse an hun tiam zawh hma pawhin an chingfel thei ang.

SEC secretary H Darzika chuan, Elec­tion Tribunal member atan hian poli­ticial party-a awm lo, sorkar hnathawk, MCS officer-te dah an ni dawn niin a sawi.

H Darzika chuan,. Election Tribunal chairman leh member turte district hrang hrangah an ruat mek niin a sawi a; SEC-a thubuai thehluhte chu vote chhiar dik tawk lo nia an ngaih vanga thehlut an ni tlangpui tih sawiin, "Serchhip district tih loh, district dang zawng aṭangin complaint kan dawng vek a ni," a ti.