October 26 - November 9 inkar Sikul khâr leh rih a ni dawn

Nimina ṭhutkhawmnaah hian School Education secretary Esther Lalruatkimi, director James Lalrinchhana leh officer dang te, SCERT hotu te, HSS Principal Council, HISSLAM, MISSTA leh MISA hruaitute an tel. Tun hnaiah Covid-19 vei an pun avang leh zirlaite zingah vei an tam tial tial avangin Covid-19 No Tolerance Forthnight (October 26 - November 9) chhung sikul chawlh an rél a ni.

Chawlhkar hnih chhung sikul khâr a nih hnuah, harsatna dang a awm loh chuan November 9-ah sikul luh ṭan leh an rél a; sikul chawlh chhungin pawl 10 leh 12 zirlaite tan online class kalpui zel ni se, an ti. Sikul chawlh rih chu MBSE lamin Board (HSLC & HSSLC) examination atana form fill-up an kalpui mek nen a intihbuai loh nan ruahmanna siam ni se, an ti bawk.

School Education Minister hoa October 12, 2020-a hotute ṭhukhawm chuan, pawl 10 leh 12 zirlaite chu October 16, 2020 aṭangin dan pangngaia sikul lut turin an rêl a; chumi ang chuan sikul an kal ṭan tawh a ni.

Nimina ṭhutkhawmnaah hian Education minister Lalchhan­dama Ralte chuan, sorkarin zirlai naupangte himna a ngaih pawimawh thu sawiin, nu leh pate hlauhthawnna te, hriselna lama hotute hlauhthawnnate an hriatthiam thu a sawi.

Lalchhandama Ralte chuan, hostel neitute tan pawh fimkhur a ṭul thu a sawi a; sikul leh hostel-te'n Covid-19 chungchanga inkaihhruaina an zawm ṭhat leh ṭhat loh en zui a nih dawn thu sawiin, hostel-ah tuna awm sate bâk chu mi dang lak luh thar a rem rih loh thu a sawi bawk.

Meeting-ah hian sikul lama thawkte chuan, zirlai nu leh pa ṭhenkhatte'n an fate sikula kaltir ngam lo an awm thu te, school huang chhungah inkaihhruaina (SOP) kenkawh a harsat thute an sawi a; chutih rualin, hun rei lo tê chhung sikul an kal chhungin naupangte'n zirlai zir châkna an neih len thu pawh an sawi a ni.