KHAWTHLIR
Thisen pe
North Lungleng Branch KṬP chuan an branch diamond jubilee lawm nan, Inrinni khan Aizawl Civil Hospital tan thisen unit 26 an pe a, a petute mipa 19 leh hmeichhia pasarih an ni. Hortoki bial KṬP-te pawhin Inrinni khan Synod Hospital tan thisen unit 64 an pe bawk.
LAD Day hmang
UPC (NEI) kohhrante chuan nimin khan nuho pawl, Ladies Auxiliary Department (LAD) Day an hmang. UPC LAD hi kum 1969-ah din a ni a, kum 1988-ah LAD Day hman ṭan a ni.
Mother’s Day
Salvation Army corps hrang hrangte chuan nimin khan Mother’s Day an hmang. Mother’s Day-ah hian nute hlutzia leh pawimawhnate an inzirtir a, naupangte’n an nute hnenah thilpek an hlan a ni.
SSPP conference
Siamsin Pawlpi (SSPP) headquarters, Aizawl chuan Inrinni khan IPR Auditorium, Aizawlah Conference cum Presidential Election an nei. ZIDCO chairman VL Robiaka, MLA chu khuallian niin, Lengzem editor Vanneihtluanga'n fuihna thu a sawi.
Silai kah zir
Counter Insurgency & Jungle Warfare School (CIJWS), Vairengtea hotute leh Vairengte SDPO Remlalliana Hnamte ruahmannain May 7, 2015 khan Vairengtea police-te leh IR police-te’n CIJWS Counter Terrorist Range-ah silai kah an zir. CIJWS instructor Maj. AK Upadhay chuan, Mizoram police-te chu India sipai training a neihpui tawhte nena khaikhinin, an hniam lo hlea a hriat thu a sawi.
Hnathawh en
Parliamentary secretary Joseph Lalhimpuia chuan Inrinni zing khan Lunglei Chanmari YMA Hall sak mek a tlawh a, hna thawh dan a enfiah. Chanmari YMA Hall atana sum ruahman chu Rs. 4,60,09,244 niin, June 15, 2016-a thawh zawh tura tih a ni.
Zalen chhuak lo
Nimin khan Zalen chanchinbu chu a chhutna khawl a chhiat avangin a chhuak loa, editor leh staff-te'n mipuite hriatthiamna an ngen.