Trade Expo buatsaihtu HC-ah a zualko

Lammuala North East International Trade Expo huaihawttu Ranjan B Gohain chuan, Expo an neih chungchangah Mizoram Merchants Association-in an puhna leh Aizawl DC hnena an zualko vanga Aizawl DC-in Expo titawp tura Cr.PC Section 144 hmanga thuchhuah a siam chu Gauhati High Court, Aizawl Bench-ah ṭhiah a dil.

Ranjan B Gohain hian Inrinni khan Aizawl Press Club-ah thuthar thehdarhtute a kâwm a; India danpuiin khua leh tuite dikna chanvo Article 19(g) a pek angin, khawi hmunah pawh expo an buatsaih thei niin a sawi a, Mizoram sorkar department hrang hranga phalna an lakte chu trade expo buatsaihna atana thil ṭul tel ve a nih vang chauha la an nih thu leh, expo nei tura trade licence lak hmasak zet a ṭulna dan a awm loh avangin phalna a la lo tih a sawi.

Trade Expo tihtawpsak an nihnaa Aizawl DC-in dan a tlawhchhan, CrPC Section 144 chu a huamchin chhûtin trade expo thila phalna nei lo anga puhna thilah hman theih nia a lan loh thu sawiin, Ranjan B Gohain chuan, High Court-ah an zualko ta niin a sawi a, "High Court thuchhuak kan nghak mek a ni," a ti a; Expo titawp tura tih an nih avangin sum an hloh nasat thu a sawi bawk.