MPC-in lungchhiatthlak an ti

MPC party chuan thuchhuah siamin, Mizoramin India rama state ralmuang ber nihna a chan chhoh mek laia mipuite tirálkhêl zawnga boruak duhawm lo - inlambun, inrîkrâp leh inkahnate a awm leh ṭhin chu lungchhiatthlak an tih thu an tarlang.

MPC chuan, an party-in Zo hnahthlakte inpumkhatna leh ram kilkhawr ber thlenga hmasawnna rualkhai taka a thlen theihna tura policy an neih­te chu political party ṭhen­khatte'n dâwtah chantir niin an sawi a, "Sorkarna siam an tum luatah mipui­te vote duhthawh vangin hnam bilte tana duhsakna lem uchuak tak an zawrh ṭhinna chuan a tak ram thlen a hnehin, buaina zakhua kan tawh phah ta zawkah kan ngai," an ti a; Mizoram tluchhe mek tungding leh turin mipuite chu MPC party thlawp turin an sáwm a ni.