Covid-19: Mizoram dinhmun Oct. 22-ah mi 18 hmuh belh

October 22, Ningani khan Mizoramah Covid-19 vei mi 18 hmuh chhuah a ni a, mipa pasarih leh hmeichhia 11 niin, an zingah Mizoram Youth Commission (MYC) chair­man Dr Vanlal­ṭanpuia, MLA a tel. Nimin khan mi pakua chhuahtir an ni thung.

Covid-19 positive Ningania hmuh chhuahte chu ZMC laboratory-a hmuh chhuah mipa pakhat, kum 44 mi te, TrueNAT-PCR hmanga Lungleia hmuh mipa pahnih leh Serchhipa hmuh mi pathum (mipa pakhat leh hmeichhia pahnih) te, Rapid Anti­gen Test (RAT) hmanga Aizawla hmuh chhuah mi 10, Serchhip leh Lawngtlaia hmuh hmei­chhe pakhat ve vete an ni.

Nimin khan hripui laka fihlim tawh mi pakua chhuahtir an ni a; SRH-ZMC aṭangin mi panga, Tribal Art Centre CCC aṭangin pahnih, Chhiahtlang CCC aṭangin pakhat leh home isolation-a awm mi pakhat an ni.

Mizoramah Covid-19 positive mi 2,359 hmuh chhuah tawh a ni a, mipa 1,894 leh hmeichhia 465 an ni. An zinga mi 2,184 (92.58%) chu chhuahtir an ni tawh a, enkawl mek mi 175 (7.42%) an awm. La chhuak lo zingah negative tawh an awm nual bawk.

October 22, Ningani khan ZMC laboratory-ah swab sample 325, TrueNAT-PCR hmangin district pangaah sample 100 leh RAT hmangin district pakuaah sample 811 endik a ni a, a vaiin sample 1,236 a ni.

Covid-19 vei ZMC labora­tory-a hmuh chhuah chu Lunglei North bialtu MLA Dr Vanlalṭanpuia (44), Khatla a ni a, October 18, 2020 khan state ramri vanga intihbuaina hmun Vairengte a tlawh a, chu bak chu zin chhuahna a nei lo.

Dr Vanlalṭanpuia chuan, Covid-19 a vei ve hlauh mai tih sawiin, "Ka kàina àwm han sawi tur ka vàn viau mai. Ramri buai issue-ah October 18, Pathianni khan Vairengte-ah MLA ṭhian ṭhenkhatte nen kan tlawh bak han puh mai tur ka hre lo. Eng pawh ni se, Pathian leh kan medical team-te zarah ka ṭha leh thuai turah ka ngai. Sunday hnua ka contact-te lo fimkhur turin ka chah che u a; in mi hriatthiamna ka dil e," a ti.

Dr Vanlalṭanpuia sawi danin, Vairengte aṭanga an haw hnuah symptoms a neih avangin a swab sample a test tir a ni. Tunah hian khawsik ser ser leh hrawk thip deuh a la nei a, ngaihtuahawm erawh a ni lo.

Sorkar thuchhuah tarlan danin, TrueNAT-PCR hmangin Ningani khan Lunglei Civil Hospital-ah Covid-19 vei mipa pahnih, kum 26 leh 35 mi hmuh chhuah a ni a, 61 Bn. BSF mi ve ve an ni. Tun hnaia Assam aṭanga lo lut, Lunglei Zotlanga BSF hmuna khung hran lai an ni a, Covid-19 symptom an nei lo.

Serchhip District Hospital-ah pawh hripui vei mi pathum - mipa pakhat leh hmeichhia pahnih hmuh chhuah a ni a, symptom an nei lo. Hmeichhiate chu kum 25 leh 54-a upa, Serchhip Chanmari Veng mi an ni a, mahni ina inkhung lai an ni. Mipa chu Assam lam mi kum 22, Tantia Constructions company hnuaia thawk a ni a, Serchhipa Tantia camp-a inkhung lai a ni.

RAT hmangin Covid-19 positive 12 hmuh chhuah thar niin, mipa pathum leh hmeichhia pakua an ni a; Aizawla mi 10 leh, Serchhip leh  Lungleia mi pakhat ve ve an ni.

Aizawlah Tuikual South-a hmeichhia pali hmuh chhuah a ni a, nautê kum khat mi leh naupang kum 6 mi an tel a, mi dang pahnih chu kum 33 leh 39 an ni. Zemabawk North-ah mipa kum 24 leh hmeichhia kum 54, Falkland Vengsangah mipa kum 15 mi, Salem Vengah mipa kum 37 leh hmeichhia kum 34 leh, Chhinga Vengah hmeichhia kum 25 mi hmuh chhuah a ni bawk.

RAT hmang vekin Lawngtlaiah hmeichhia kum 15-a upa, Vengpui-II venga cheng hmuh chhuah a ni a; Serchhipah pawh Chanmari Venga hmeichhia kum 74-a upain hripui a vei tih hmuh chhuah a ni.