Covid-19 No Tolerance Fortnight-ah Traffic Police-te pawh an khauh dawn
October 22, Ningani leh nimin khan Secretariat leh CS conference hall-ah October 26 aṭanga 'Covid-19 No Tolerance Fortnight' kalpui dan tur Covid-19 Medical Operational Team chairman Dr ZR Thiamsanga, MLA hoin sorkar thuneitute'n an rêl. Fortnight chhungin Traffic Police-te pawh khauh taka dan kengkawh tura tih an ni.
Dr ZR Thiamsanga chuan, Covid-19 Medical Operational Team ngaihdanah chuan khawtlangah Covid-19 ṭâi darh (community transmission) a awm tawh tih a sawi a, "Hemi chhu chat thei tura hmalakna ṭha ber chu inkharkhip ni-ah kan ngai. Mahse, inkharkhip hi sorkar laipuiin a phal tawh loh avangin khauh taka Covid-19 No Tolerance Fortnight kalpui a nih chuan, eng emaw chen hri ṭai darh tur a ven theih a beiseiawm," a ti.
Chief secretary Lalnunmawia Chuaungo sawi danin, Covid-19 No Tolerance Fortnight chhungin Covid-19 dona atana sorkar ruahmanna siam hrang hrang - Unlock Guidelines, Standard Operating Procedure (mipuite zawm tur) hrang hrang leh The Mizoram (Containment and Prevention of COVID-19) Ordinance, 2020-te khauh tak leh ngaihnathiamna tel loa kalpui a ni ang.
Meeting-a rel a nih dan chuan Traffic Police pawhin Mizoram chhungah No Tolerance Fortnight khauh takin an kalpui dawn a, lirthei document dik lo leh driving licence nei loa lirthei khalhtute an man dawn bakah, traffic rules bawhchhiate ngaihnathiamna tel loin an man ang.
Dan hrang hrang kengkawh turin police, local/village task force leh sorkar hnathawk dangte a ṭul dan anga inruat a ni dawn a, hmun hrang hrangah duty dan tur ruahman a ni.
Ṭhutkhawmah hian, puipunna, chhiatni, ṭhatni-ahte mipuiin SOP an zâwm ṭha lo chu an ngaimawh thu te, sikul leh hostel luh chu a him rih loh thu te, zan curfew khauh zawk kalpui a ṭul thu te, dâwr leh sumdawnna hmunah social distancing zawm a nih loh thute sawi a ni..
Covid-19 No Tolerance Fortnight chhung hian office tinah Covid-19 dona banner/poster tar tur a ni a, vantlang hmun lun laiah hetiang banner leh poster hi tar tur niin, khawtin leh vengtinah vantlang aurinna hmangin mipuite zirtirna thu puanchhuah tur a ni ang.