AMC-ah sorkarin SEC a ngaichâng

UDPA department changtu deputy chief minister Tawnluia chuan, Aizawl Municipal Corporation (AMC) inthlan hun turah State Election Commission (SEC) an ngaihchàn thu a sawi.

Vanglaini palai zawh­na chhángin Tawnluia chuan, AMC inthlan hun tur chu SEC thuneihna a nih thu a sawi a, "Sorkar chuan inthlan hun tur hi kan sawi thei lo. SEC lamin boruak uluk taka thlir chungin inthlan hun tur hi an buatsaih turah kan ngai. A theih ang angin an inbuat­saih chho ve rengin ka ring," a ti.

Dy. Chief Minister chuan, AMC aiin LADC term a tawp hmasa zawk dawna a hriat thu sawiin, "SEC lamin LADC inthlan hun pawh an la puang lo a, AMC inthlan hun tur pawh hriat theih a la ni lo," a ti a; LADC inthlan zawhah AMC inthlan buatsaih a nih a rin thu a sawi.

Hetih lai hian, Vanglaini palai zawhna chhangin SEC hotute chuan, Mizoram sorkarin AMC inthlan hun tur atan rawtna a neih hunah ṭha taka inthlan buatsaih turin an inbuatsaih mek thu an lo sawi tawh thung.

Tarlan tawh ṭhin angin, tuna AMC councillor ni mekte chu November 26, 2015-ah thlan tlin a ni a, December 10, 2020-ah an term a tàwp dawn. AMC nodal department chu UDPA a ni.