Vairengte khawtlangin IR awmna tur Auto-rickshaw stand thlangah an sa

Vairengte khawtlang chu nimin khan Vairengte auto-rickshaw stand tharah Mizo IR police-te awmna tur sain an hnatlang a; ràl aṭangin Assam police-te'n an en.

Vairengte aṭanga thu­dawn danin, Mizo IR sipaite awmna tur sak hnatlangah hian ruah a sûr reng avangin nimin tlai khaw thim hnuah hna an thawk ṭan thei chauh a; hna­tlanna hmunah hian MZP hruaitute pawh an awm.

Mizo IR police-te chu Vairengte auto-rickshaw stand-ah an la inkulh a, niminah Assam mi leh sa rawn kal an awm lo. Mizo IR-te chuan a tìr lamah chuan hnatlang turte chu hnatlang lo turin an ti a, mahse, a hnuah erawh harsatna an siam chhunzawm lo.

Vairengte khawtlang hnatlang hi Assam police-te'n ràl aṭangin an en ṭhin a, he thu ziah lai thleng hi chuan harsatna leh buaina an siam lo.

Hetih lai hian, Cachar DC chuan October 22, Ningani khan Kolasib DC hnenah lehkha thawnin, state pahnih Home secre­tary-te inbiak ṭuma inrem­na angin ramria hma­lakna neihtir lo turin a ngen.

Kolasib DC chuan nizan khan Vairengte Joint VC chairman Lalfamkima leh MZP Gen.Hqrs. president B Vanlaltána te a kâwm a, he thu ziah lai hian an inbiak dan kimchang hriat hman a ni lo.