Hripui vei hmuh thar mi 18 zingah Mizorama kái 15, symptom nei 10

October 22, Ningania mi 1,236-te swab sample endik aṭanga Covid-19 vei mi 18 hmuh chhuah zingah Mizoram chhunga kái chhâwng (local positive contact) 15 an awm a, taksaa harsatna nei (symptom lang) mi 10 an awm bawk.

Covid-19 vei hmuh thar zinga Mizorama kai chhâwng mi 15-te hi hmuh chhuah zawng zawng aṭangin 83.33% an tling a; state páwn aṭanga rawn lut thar chu mi pathum chiah an ni. Mizorama kái mi 15 zingah kàina hriat theih mi 11 an awm laiin, kaina hriat loh mi pali an awm.

Hripui vei hmuh thar zinga mi MLA Dr Vanlalṭanpuia chuan Vanglaini palai zawhna chhangin, ramri buai vanga October 18-a Vairengte an kal haw hnuah Covid-19 symptom a neih avangin a sample a endiktir tih a sawi a, "Khawsik ser ser leh hrawk thîp deuh ka la nei. Ngaihtuahawm ka ni lo," a ti. MLA hi New MLA Hostel CCC-ah enkawl a ni ang.

Tuikual South aṭanga thu dawn danin, an venga hmeichhia palite chu chhungkaw pahniha mi an ni a, inṭhenawm an ni. Hmeichhia kum 33 mi leh a fanu thla 1 mi te, nu kum 39 leh a fanu kum 6 mite an ni a; symptom an nei vek.

Falkland Venga mipa tleirawl kum 15 mi chu Ebenezer School, Zemabawka zirlai a ni a, symptom a nei. Ebenezer School-ah hian October 21 khan hripui vei mi pakua hmuh a lo ni tawh.

Mualpui, Salem Venga Covid-19 positive mi pahnih chu nupa an ni a, Aizawl Civil Hospital OPD-ah inentir tura an kalnaah, symptom an neih avangin RAT hmanga endik niin, hripui an vei tih hmuh chhuah a ni; hri an kàina hriat a ni lo.