Bangladesh-ah dân kalha teak tawlh tam 'India leh Bangladesh sorkarin ṭan lâk a ṭul' - DFO
Tlabung ram chhung leh a chhehvel hmun hrang hrang aṭangin teak tum (log) tam tak Khawthlangtuipui hmangin Bangladesh lamah tawlh luh ṭhin a ni. Mizoram Forest department-a Tlabung Forest Division hotute chuan, dan loa teak tawlhte chu véngin, eng emaw zat an man tawh a, mahse, dan vek a harsa a, India leh Bangladesh sorkarin ṭan an lak a ṭul thu an sawi.
Tlabunga FDO Lalbiakchama sawi danin, kum 2018 aṭanga November 2019 thleng khan dan kalha teak tawlh an mante aṭangin Rs. 4,93,000 an chawitir tawh. DFO chuan, "Bangladesh lama teak tawlh hi danin a remti lo a, India leh Bangladesh sorkar thil a ni a, ṭan lak a ṭul. Lunglei court-ah pawh thubuai panga kan nei mek a ni," a ti.
DFO Lalbiakchama Chawngthu chuan, Mizoram aṭanga Bangladesh lama teak tawlh turin phalna pek theih a nih loh thu sawiin, "Mimal teak plantation nei tan chauh permit kan pe a, sorkarah an inziah luh a ngai. Permit kan pek hnuah transit pass kan pe leh a; chutih rualin, Bangladesh-a tawlh turin permit pek theih a ni lo a, India sorkarin a phal lo," a ti. Tlabung DFO sawi danin, Tlabunga a awm hnuah permit nei loa Bangladesh lama teak tawlh tum 3,000 vel chu an man tawh a; teak chu Lunglei leh Mamit aṭangte pawhin an tawlh bawk ṭhin a ni.
Vanglaini palaiin tun hnaia Khawthlangtuipui a tlawhnaah, tuipui kam hmun eng emaw zatah teak tum dah khawm tam tak a awm a, chu'ngte chu Bangladesh lama tawlh thlak tur niin mi ṭhenkhat chuan an sawi.
Tlabung MZP president hlui Lalchamliana chuan, teak tam tak chu Chakma hoin Forest Plantation-a mi an ru ṭhin tih sawiin, "Plantation hi a zau hle a, lui dung hi a dâp tluan a ni ber. An tawlhte hi a rapthlak khawp mai. A pawi ber chu, kan ramngaw ber a chhiat chuan nakinah luipui tui a kám zel ang a, kan la tuar dawn a ni. Heng ho hi kan do rei tawh a, tun hma phei chuan thubuai pawh kan lo thehlut tawh a ni," a ti.
Lalchamliana sawi danin, teak leitu tak chu Bengali ho an ni a, Bangladesh-a Ṭheka khuaah dah khawmna an siam a, Chakma hel pawl Santi Bahini hoin Horina thleng bak an thlen an remti lo. Vai ho chuan Chakma an rin zawngte hnenah pawisa an hlân a, Chakma-te chuan Mizorama Chakma an rin zawngte hnenah pawisa an hlan chhâwng leh a ni. Lalchamliana chuan, "Hetiang thilah hian Forest department field staff ṭhenkhat pawh an inhnamhnawihin rin an kai hle. Teak hi ṭum khatah 500 man ta se, 1,000 chu a tlang ngei ngei ang," a ti a; teak mante chu an lilám a, mipuia hmai phih nan sorkarah revenue-ah a lut ṭhin niin a sawi.
Tlabung YMA president leh Khawthlangtuipui Group YMA treasurer Lalhmunmawia Ngente chuan, tun hma aṭangin YMA sub-hqrs leh Forest department hotute hnenah teak tawlh ruk chungchang chu an thlen tawh ṭhin tih sawiin, "A nghawng a lian hle zel a, thil tih a harsa a nih hmel. DFO Pu Chama pawhin a vei a, lui dungahte pawh an man ṭhin. Mahse, a zin laiin an man khawm sate a bo cháng a awm," a ti. MZP Sub-Hqrs, Tlabung president P Vanlallawma'n RTI Act hmanga a zawhna, Tlabung Divisional Forest Office-in an chhan dan chuan, kum 2018-19 (November) thla thleng khan Tlabung Forest Division-in teak permit 12 an pe chhuak a, chumi chhung vêka dan loa teak an mansakte hnen aṭanga sum an chawitir zat chu Rs. 4,93,000 a ni a, teak man sa lilàmna aṭangin Rs. 45,31,629 an hmu bawk.
o Mizoram aṭangin ram dangah teak thawn chhuah phal a ni lo.
o Mizorama teak tam tak Khawthlangtuipui kaltlangin Bangladesh-ah tawlh luh a ni.
o Thuneitute'n eng emaw zat an man tawh; man loh tam tak a awm.
o Chakma hoin Forest Plantation-a mi teak an ru ṭhin.
o Teak leitu ber Bengali hoin teak man tur Bangladesh-a Chakma-te hnenah pawisa an hlân a, Chakma-te'n Mizorama Chakma-te hnenah an hlan chhâwng leh ṭhin.
o Kum 2018-19 (November) thlengin Tlabung Forest Division-in teak permit 12 an pe chhuak.
o Kum 2018-19 (November) thlengin dan loa teak mansakte Rs. 4,93,000 chawitir a ni.
o Kum 2018-19 (November) thlengin teak man sa lilàmna aṭangin Rs. 45,31,629 hmuh a ni.