Zonunmawi, huaisenna leh thawhrimnate nen Zoramthar i din ang u - Art & Culture Minister

Reiek kawnga Hangzo Natural Park, Zawhzazo Run chu Ningani tlai khan Art & Culture minister R Lalzirliana'n a hawng a, Zonunmawi, dikna leh huaisenna, thawhrimna nen inthuam thara Zoramthar din leh turin mipuite a sawm.

Art & Culture Minister chuan Zofate chu a sur a sa hnuaia zam ve ngai lo hnam kan nih thu sawiin, "Thawhrimna hi hlawhtlinna bul a ni tih hi ṭhalai tam tak hian kan theihnghilh ṭan ta. Nu leh pate thawhchhuah sa ringin an nung a, an duh dan dana inchei parhin tuthlawh leh chemtum hum thiam an awm tawh mang lo a, taima leh thawkrim tan lo chuan kan dam chhung hun nuam taka hman hi a harsa a ni tih ṭhangtharten kan hriat a ṭul thar leh hle a ni," a ti.

Pathian pawhin Eden huana cheng tlak loa a ngaih hnuah mihringte tan beka thlan tui luang zawih zawiha thawhrim a ngai tawh tih sawiin R Lalzirliana chuan, "Zoram hi thlai engkim ṭhatna hmun a ni a, tun hmaa kan neih ngai loh thlai leh theitui thar hrang hrangte kan hmu thar zel ta a nih hi. Rim taka kan thawh chauhin kan ram hi hlim takin kan luah thei ang," a ti a, ṭhalaite chu mahni hna ṭheuh rim tak leh taima taka thawk turin a chah.

R Lalzirliana chuan, kan ramah Khuanu ruat sa, phaitual hnim chung ngeia len leh vah velte chu a hlimawmin a nuam bik tih sawiin, "Ram dang aṭanga chahluh phullem phah vel kan ngaisang ta tlat a, Khuanu-in a lo duan sa ṭha taka enkawlna chang kan hre ta lo hi a pawi hle zawk a ni. Hnam tinin infiamna leh intawllenna ṭha kan mamawh vek a, office-a thawk leh hna hrang hrang thawkte tan pawlho emaw, chhungkua leh ṭhianhoa intihhlimna ṭha kan mamawh a ni," a ti.