Mizoram china a ngaihah police post siam turin MPYCC-in sorkar an phût

Congress party ṭhalaite chuan thuchhuah siamin, Mizoram sorkar chu Mizoram china a ngaihah police duty post siam tura an phût thu an tarlang.

MPYCC chuan, Mizoram leh Assam ramri buainaah Vairengte mipuite'n huaisen takin Lailapur mipuite thui tak an nawr lêt tawh tih sawiin, "Mizoram sorkar hian Mizoram ramria a pawm chinah police outpost nghet (permanent structure) a siam ngei kan phût tlat a ni," an ti a; police outpost siam turin a rang lama hma la turin sorkar an phût a ni.

Ramri buaina kal zelah October 21, 2020-a Lailapur-a state pahnih home secretary-te inbiakna leh an rorelte chief minister Zoramthanga'n a hriatpui loh thu a sawi chu pawi an tih thu sawiin MPYCC chuan, "CM hian ramri chungchanga state pahnih inbiakna a hriatpui lo a nih chuan rorelna mumal lo 'administrative lapse' lian tak a ni ang," an ti a; CM-in a hria a nih chuan khawvel mithmuhah dâwt a sawi tihna a nih thu an sawi.

MPYCC chuan, Mizoram leh Assam ramri chungchangah Mizoram sorkar chu a ngaihdan mumal tak sorkar laipuia thehlut ve tawh turin an phût bawk a, "All party, kohhran, NGO, etc. ráwn chung zelin sorkar hian ramri buai chinfel a nih theih nan 'comment' mumal tak an pek thuai kan ngiat," an ti.

Congress ṭhalaite chuan, Vairengte thlanga Assam mite'n dan loa in an sak, October 17 zana kâng bâng la awmte ṭhiat vek tur leh, Saihapui-V dáia Assam mipuiin an tihchhiat tâk Village Task Force duty post, Assam police-te luah zui tâkah Mizo IR duty post siam turin Mizoram sorkar an phût bawk.