IWR-in staff-te tan training buatsaih

Irrigation & Water Resources department (IWRD) chuan October 22, Ningani leh nimin khan National Hydrology Project (NHP) hnuaia ‘Efficient Irrigation and Water Management Practices’ tih thupui hmangin an directorate committee room-ah training an buatsaih.

Training hawnna, Ningania neih chu IWR minister C Lalrinsanga'n a hmanpui a; Minister chuan, "IWRD hi Mizoram ei leh bâra a intodelh theihna tura fawng pawimawh tak chelhtu a ni a, department dangte nen pheikhai rual takin, hlâwk zawka ei leh bar kan thar theih dan tur ngaihtuah chungin, ram hmasawn nana theihtawp chhuaha ṭan lâk zel a pawimawh," a ti.

IWRD Minister chuan, an department chuan bung thar a kái tih sawiin, "Mizoram Water Policy pawm a ni tawh a, hemi hnuaiah hian dan hrang hrang siam tur tam tak hmachhawp a ni," a ti a; state páwn aṭanga lâk luh ngai loa Mizoram chhunga thar chhuah hmanga intodelh a nih theih nan ṭan la tur leh ram neitu nih inhriaa an hna chanpual ṭheuh chu Mizoram tan an thawk tih hre turin department mite a fuih.

Training-ah hian IWR department hnuaia technical staff-te an tel a; chu'ngte chuan lo neitute hnenah training an pe chhâwng leh dawn a ni.