Lengpui Airport chei that a ni AAI leh sorkar an inrem thei lo

Non Lapsable Central Pool of Resources (NLCPR) aṭanga sum hmuh hmangin Lengpui Airport chei ṭhat mek a ni. Hetih lai hian, Airport Authority of India (AAI) hnena Lengpui Airport hlan tumnaah Mizoram sorkar leh AAI an inrem thei lo.

GAD (Aviation Wing) hotute hnen aṭanga Vanglaini thu dawn danin, Lengpui Airport-ah hian thil chi hrang hrang pali chei ṭhat mek a ni a, chei zawh a nih hunah a changtlung sawt dawn a ni. A chei ṭhat hna hi Mizoram PWD-in an thawk a, a chei ṭhat nan hian tun dinhmunah NLCPR aṭangin sum first instalment leh second instalment hmuh tawh a ni.

Lengpui Airport-a chei ṭhat hna thawh mekte chu airport-a thlawhna tam zawk dah a nih theihna tur siam te, thlawhna a ṭum sual emaw, a thlawk thei lo a nih pawha a chetsual lohna atana runway zawha hmun zawl zau siam te, airport chhung­a thlawhna tam zawk a ṭum theihna tur siam te, airport leh thlawhtheihna ṭha zawka an inbiakpawh theihna tur siamte a ni.

Zawhna chhangin Aviation Wing hotute chuan, zana thlawhtheihna a ṭum theihna tura Lengpui Airport siam tumna a la awm loh thu an sawi a, "Zana thlawhtheihna ṭum theihna tura siam tur chuan tih tur a tam hle a, kaihhnawih tam tak a nei a ni," an ti.

Hun rei tak chhung AAI kuta Lengpui Aiport hlan tumna chu a la hlawhtling thei lo tih sawiin, Aviation Wing hotute chuan, "AAI kuta Lengpui Airport hlan tumna hi a awm reng a, mahse thil pakhatah kan inrem theih loh avangin kan hlawhtling thei lo," a ti a; AAI kuta airport hlan a nih theihna atan hmalak a la nih zel dawn thu an sawi.

Aviation Wing hotute sawi danin, AAI leh Mizoram sorkar inrem theih lohna chu AAI kutah Lengpui Airport hlan a nih huna security chungchang a ni. AAI chuan an kuta airport hi hlan a nih hnuah pawh security chu Mizoram sorkar kuta a awm an duh a, hei hi Mizoram sorkar chuan an duh lo thung a ni.