I-League club thar Aizawl FC an lo thleng

India rama football club-te inelna sang ber I-League khel tura inpet tling thar, Aizawl Football Club-te chuan nimin khan Aizawl an rawn thleng a, MFA buatsaihin Lammualah anmahni lawmna hun hman niin, Home minister R Lalzirliana'n a hmanpui.

Aizawl FC hmuahnaah hian MFA honorary secretary Lalnghinglova Hmar-in inlawmna thu a sawi a; Home Minister chuan, Mizoram sorkar­in infiamna lama Mizo ṭhalaite'n hma an sawn theihna atan theihtawp a chhuah tih sawiin, "Sorkar hna thawk turin kan fate kan beisei a, an tlin lo ṭhin. Infiamnaah hian eizawnna a awm a ni," a ti a, mi hausa leh neinungte chu mite tana malsawmna ni tura luang chhuak turin a sáwm.

Central YMA president Lalbiakzuala pawhin thu sawiin, Aizawl FC hlawhtlinna chuan Zofate inpumkhatna thlen se a duh thu a sawi a, "India ram zau takah hian hnam dangte tih theih kan ti ve thei a ni tih hriat tharna atan i hmang ang u. Zofate hi hnam dangte aiin kan duai bik lo," a ti.