Aizawlah Astronomy & Space Science Exposition Theatre siam a ni dawn

Planning & Programme Implementation department hnuaia Directorate of Science & Technology chuan nimin khan Mizoram Science Centre-a National Technology Day an hmang a; Planning minister Lalsawta’n hmanpuiin, Innovation Hub leh Astronomy & Space Science Exposition Theatre building lungphùm a phúm.

National Technology Day hmannaah hian National Council of Science Museum, Kolkata-a director general GS Rautela chu khualzahawm a ni a, Fun Science Extension gallery a hawng ve bawk.

Minister Lalsawta chuan, science leh technology chu mihring hriselna, zirna, ei leh bar zawnna leh ram rorelna thlengin a ṭangkai tih sawiin, "Kawng tinrenga khawvel mamawh phuhrûk turin a ṭangkai a ni," a ti a; Mizo ṭhalaite chu khawvel hmun danga mite aiin an hniam bik lo tih sawiin, India ram leh khawvel huap pawha scientist ṭha an la nih theih ngei a beisei thu a sawi.

GS Rautela pawhin thu sawiin, Mizorama Science and Technology department hmalakna leh hmachhawpte chu lungawi­thlak a tih thu leh Science Centre pawh thuam ṭhat zel theih a nih tur thu a sawi.

Innovation Hub leh Planetarium sakna atan hian cheng nuai 273 ruahman a ni a, hna thawh bul ṭan nan cheng nuai 81 hmuh tawh niin, thla 18 chhunga peihfel tur a ni. A chhawng chung zawkah Digital Planetarium dah a ni ang a, a chhawng hnuaiah Innovation Hub a awm ang.

Innovation Hub-ah hian Discovery Hall, Innovation Resource Centre and Hall of Fame, Idea Lab. leh Design Studio-te dah tum a ni a; Digital Planetarium chu mi 55 vel ṭhut theihna tura ruahman niin, space leh astronomy show enna tur a ni.