Congress-in MNF sorkar leh an ring: Zorama

MNF president Zoramthanga chuan, MNF chauh ni loin, Congress party leh sorkar hnathawkte pawhin MNF a sorkar leh ngei an ring niin a sawi a, "Congress sorkar hian sum enkawl chungchangah a ngaihna an hre lo a, an êkcheh ṭhut a, engmah tak tak an ti thei lo," a ti.

Nimina Mizo Hnam Rûna inkhawmah thu sawiin, Zoramthanga chuan, MNF an sorkar leh a nih chuan chawa intodelh chu an ngai pawimawh ber dawn tih a sawi a, "Mizoramah leileta siam theih ram hectare 70,000 chuang ram âwl a a, hengte hi leilet a siam a, buh chîn loh laiin thlai chi hrang hrang chîn nan hman a ni ang a, Mizoram a châwm hneh hle dawn a ni," a ti a; saa indelh nan vawk, ar, bawng leh ran chi dangte vulhnaah hmalakna lian tham kalpui a nih tur thu a sawi.

MNF president chuan, MNF a sorkar chuan ṭhelrêt ṭha chi leh mau ṭha chi chìn a ang a, kut hnathawktute'n sum tam tak an la lut thei dawn nia sawiin, "Zirna leh health care chungchangah sorkarin nasa takin hma a la dawn. Sorkar hna hmu lo, drugs leh zu ngawl vei thlengin MNF sorkar leh hi an nghakhlel a ni," a ti.

MNF senior vice president Tawnluia pawhin thu sawiin, VC leh LC inthlan result-in MNF party chu dâwm kân tur a la awmzia a tichiang niin a sawi a; "Congress hian miretheite a VIP lohzia a chiang hle a ni," tiin, Pathian leh mipui zarah MNF chu a sorkar leh ngei dawn niin a sawi bawk.