KHAWTHLIR

Thisen pe
Inter-Branch YMA Football Tournament khelh meka tel ve East Lungdar YMA Football Team-te chuan nimin khan Aizawl Civil Hospital blood bank-ah kalin thisen unit 9 an pe. East Lungdar khua hian Aizawla football tournament an khelhin an tlak hnuah ṭum nga thisen an pe tawh a ni.

Killuaia lehkhabu
Rev. H Killuaia lehkhabu ziah pahnih - 'Killuaia chawfûn' tih leh 'Killuaia manâ' tihte chu April 9, 2015 khan BCM Chanmari, Lunglei Sunday School Hall-ah parliamentary secretary Joseph Lalhimpuia'n a tlangzarh.

Chaw nghei zel
Lungleia Sikul Ṭan Hma Duhlo Pawl invuahte chuan sikul kai hun sawn hma an duh loh vanga lungawi lohna lantir nana chaw an nghei chu an la chhunzawm zel a; chaw nghei zinga ṭhenkhat chu damdawi-inah hruai an ni tawha thu dawn a ni.

Bail dilna hnawl
March 28, 2015-a MLA pathumte leh anmahni zuitute lambun thubuaia May 16-a man, HPC(D) mi pathum zinga pa­khat - Ngurthantluanga Sanate-in bail a dilna chu Court-in a hnâwl.

Biate lawm
Biate VC, YMA, MUP, MHIP, MZP leh Biate Welfare Society-te chuan thuchhuah siamin, Ministry of Urban Development-in Biate Water Supply Scheme (pumping) siamna atana cheng nuai 1364.67 a pawm ta chu lawmawm an tih thu leh, a hlawhtlin theihna tura hma latu UD&PA minister Zodintluanga leh UD&PA leh PHE-a thawkte chungah an lawm thu an tarlang.

Ph.D hmu thar
Robert Lalrinsanga s/o H Rohmingthanga, Mission Veng chuan BCKV, Agricultural University, West Bengal aṭangin doctor of philosophy a hmu thar a, a thesis chu 'Studies on the relationship between leaf number and area on fruit growth and development of diffrent mango, cvs Langra, Himsagar and Amrapali' tih a ni.

Mi bo zawng
Kulikawn Police Station aṭanga thu dawn danin, Lalrinmawia (26) s/o Chhuansanga, Hlimen chu May 6, 2015 aṭang khan a bo a, amah âwm ang hmute chu Kuli­kawn PS phone number - 2322379-ah emaw, 9862221774-ah emaw hriattir turin an ngen. Lalrinmawia hi ft. 5'8" vela sang a ni a, a bo ni hian t-shirt vut buak rawng leh kekawr bûl dum a hâ a ni.