Odisha MLA-te Aizawlah an rawn zin

Odisha Legislative Assembly-a Committee on Petitions member-te chuan May 9, 2015 khan Aizawl an rawn thleng a, an rawn thlen zanah hian Mizo­ram Assembly-a Committee on Petitions member-te nen State Guest House-ah an inkâwm.

Sorkar thuchhuah tarlan danin, Odisha MLA-te chuan Mizoram nuam an tih thu an sawi a, "Mizo hmeichhiate'n mipa ang maia hna an thawk nasa kan hmuh hian mak kan ti hle. Mipa leh hmeichhia inenhranna awm miah lo hi in ngaihsanawm hle a ni," an ti a; Mizoram MLA-te chu remchang hmasa bera Odisha tlawh turin an sâwm.

Mizoram Assembly Commitee on Petitions-ah hian chairman chu PC Zoram Sangliana a ni a, member-te chu - RL Pianmawia, K Sang-ṭhuama, T Sangkunga leh Dr K Beichhua te an ni.

Meeting-ah hian Mizoram MLA-te chuan Odisha MLA-te chu an kalphung leh Mizorama hna thawh a nih dante an hrilh. Odisha MLA rawn zinte hi panga an ni a, Pathianni khan Guwahati panin Mizoram an chhuahsan a ni.