MLA-te'n kawng siam mek an tlawh

Mizoram Legislative Assembly hnuaia Committee on Estimates chuan nimin khan Buichali lei leh Kawnpui inkara NH-44A-a blacktoping, tuihâwk luankawr siam leh lung rem hna ABCI infrastructures Pvt. Ltd-in an thawh mek an enfiah.

Committee on Estimates chuan July, 2014-a kawng siam mek an tlawh hmasak ṭuma siamṭhat tur an tihte bakah, rawtna ṭhenkhat an neih­te chu hna thawktu contractor-te'n an zâwm ṭha niin an sawi a; chutih rualin, tuihâwk luankawrte chu a rang lama thianfai tur leh, tuihâwk luankawr chilha kawng siamte chu a rang lama tifai turin PWD leh contractor-te an hrilh a ni.

Sorkar thuchhuah tarlan danin, Kawnpui leh Buichali inkar kawngpui siam meka blacktoping hna chu zawh thawkhat tawh a ni a, tuihâwk luankawr erawh chu km. 4 chuang hreta thui thawh zawh a la ni lo.

Kawng siam endiknaah hian Committee on Estimates hi chairman Lalrinliana Sailo hoin member - Vanlalzawma, T Sangkunga, R Vanlavena leh Vanlalawmpuii Chawngthu te an kal a ni.