MBSE-in HSSLC result tarlan dik lo sawifiah

Mizoram Board of School Education chuan thuchhuah siamin, HSSLC Examination 2015 result-a MBSE website-a dik lo awm chu Excel file format-a leh (convert)-naah subject mal hrang hranga mark hmuh zat a tawlh danglam vang niin an tarlang.

MBSE chuan, HSSLC 2015 result-ah dik lo leh tihsual a awm lo nia sawiin, "Candidate-te mark hmuh hi tabulation sheet-ah dik takin ziah luh vek a ni a, chu database hmang chuan marksheet pawh dik taka print chhuah vek a ni. Aizawla HSSLC Examination Centre zawng zawng leh khawpui pawn centre eng emaw zat pawhin result tihchhuah ní la la khan an la chhuak vek hman a, Lunglei, Lawngtlai leh Saiha districts chhunga candidate-te marksheet pawh thawn chhuah vek hman a ni," an ti.

MBSE tarlan danin, HSSLC chu MBSE website-ah dah a ni a, result database aṭanga Excel file format-a lehnaah candidate ṭhenkhat, a bikin Commerce leh Science subject mal hrang hranga an mark hmuh zat a tawlh danglam a; roll number, hming, total mark leh division erawh a che sawn lo. Tawlh sawn a awm avang hian subject-a pass kim lote pass kim angin a lang a, fail ṭhenkhatte pawh pass angin a lang a ni.

MBSE chuan, HSSLC 2015 result-ah dik lo a awm hriat a ni lo tih sawiin, "Website-a târ chhuah a dik lo palh zawk a lo ni a, a dik lo tih hriat a nih veleh website-a result dik lo awm chu tihtawp nghal a ni," an ti a; result dik chu result chhuah ni tlai lam dar 5:40 velah tihlan leh nghal a nih thu an tarlang.

Website-ah hun eng emaw ti chhung candidate ṭhenkhatte subject mal hrang hranga an mark hmuh zat dik lo târ chhuah palh a ni chu pawi an tih thu sawiin, MBSE chuan thupha an chawi a ni.