Covid-19 darh zel lohna atana Hmalak dan tur DC hoin rel
Lawngtlai DC Dr Andrew H Vanlaldika hoin nimin khan a pisa-ah official, Central YLA leh VLTF aiawhte'n an district chhunga Covid-19 positive hmuh chhuah belh chungchang leh mipui vantlang zinga Covid-19 a darh zel loh nana hma lak dan tur an sawiho.
Dr Andrew H Vanlaldika chuan state pawn aṭanga lo haw leh quarantine centre-a khung hran ni lo, zirlai sikul lut tur endik zinga tun hnaia positive panga hmuh chhuah an ni chu a vanduaithlak tak zet tih sawiin, "Sorkarin thil ṭul hrang hrang buaipuiin, medical team-te'n ngawrh takin contact tracing an kalpui a, primary contact sample endik tawh zingah positive case hmuh chhuah a la ni lo," a ti a, vantlang zinga hri a darh zel loh nan sorkar, VLTF, tlawmngai pawl leh mipuite ṭanrual a ṭul thu a sawi.
Meeting chuan vantlang zinga Covid-19 a darh zel loh nan hrikai hmuh chhuah tharte contact tracing tih chhungin mipuite chu khauh zawka inkhuahkhirh dan ngaihtuah ni se, an ti. Hemi bawhzui nan hian DC chuan naktukah Lawngtlai khawpui chhunga damdawi dawr leh thlai hnah/chawhmeh zuar ni lo dawr dang hawn leh inpho khapna thupek leh Pathianni zing dar 8 leh zan dar 6 inkara Lawngtlai khawpui chhunga phalna nei lo tana pawn chhuah khapna thupek a chhuah nghal.