Central YMA-in mipui ngen

Central YMA chuan thuchhuah siamin, October thla laihâwl vel aṭangin Mizoramah Covid-19 a darh nasat leh tâk avangin sorkar thupek leh task force thuchhuakte ṭha taka zâwm turin mipui an ngen a; hripui léng vanga harsatna tâwkte ngaihvena chhawmdâwl turin an chah bawk.

CYMA chuan, "Hri léngin Mizoram hmun hrang hrang min nuai leh ṭan ta a, Mizo mipui kan him tlân zel theih nan sorkar thupek leh veng/khaw tina task force-te thu leh hla ngaichâng a, zâwm ṭheuh turin kan inngen e. Hri léng vanga harsatna tâwkte chhawmdawla ṭanpui zel thei turin mi tin i inbuatsaih ang u," an ti.

Central YMA chuan, Covid-19 hripuiin Mizoram a chênchilh mek karah, mipui himna tura thawktu hrang hrangte chungah lawmthu an sawi a; hripui lakah Mizoram mipui an him zel theih nan Pathian hnena ṭawngṭai turin mipui an ngen bawk.