MLA Vanlalthlana'n bungrua a sem

Aizawl North-II bialtu MLA Dr Vanlalthlana chuan January 20, Thawhṭanni khan Whitestone Conference Hall-ah a bial chhunga mimal, sikul leh college ṭhenkhat hnenah bungrua a sem.

Dr Vanlalthlana hian mi 15 hnenah Rural Housing Scheme aṭangin rangva a sem a, sikulte hnenah School Education department aṭanga dawn greenboard 10 leh water filter a sem. MLA fund aṭanga lei computer printer panga chu sorkar sikul panga hnenah a pe a, Aizawl North College hnenah book grant Rs. 50,000 a pe bawk.

Dr Vanlalthlana chuan, Rural Deve­lopment Minister leh School Education Minister-te hmalaknaa a bial chhunga rangva, greenboard leh water filter sem a ni chu lawmawm a tih thu a sawi a, a dawngtute chu ṭangkai taka hmang turin a chah. Amah pawh college-ah zirtirtu a ni tih sawiin Vanlalthlana chuan, zirna a ngaih pawimawh thu leh Aizawl North-II chhunga sorkar sikula zirna chawisanna turin theihtawp chhuah a tum thu a sawi a; a bial chhunga sorkar sikulte a tlawh deuh vek tawh thu sawiin, an harsatnate a hmuna enpui zel a tum thu a sawi bawk.

Zirtirtu kal khawmte aṭanga rawtna awm angin, awmze nei zawka primary school, middle school, high school leh higher secondary school level-ah bialtu MLA hoa zirtirtute inhmuhkhawm a, zirna hmasawnna tur sawiho an rêl nghal a ni.