KHAWTHLIR

Nimin khan Hnahthiala PYD (NEI)-te'n Hnahthial Venglai YMA Hall-ah thisen pek rûnpui an huaihawt a, mipa 23 leh hmeichhia pangate'n Lunglei Civil Hospital tan thisen unit 28 an pe. Salvation Army Youth (SAT)-te pawhin Hnahthial Bazar YMA Hall-ah Lunglei Civil Hospital tan thisen unit 12 an pe bawk.

Senate of Serampore College (University) chuan October 22, Ningani khan Master of Theology (M.Th.) final year exam result a tichhuak a; Aizawl Theological College (ATC) zirlai 27-te an pass vek. ATC zirlaite hi A- (first class)-ah mi 12, B+ (second class)-ah mi 14 leh B grade-ah mi pakhat an pass a ni.

October 26- November 9, 2020 inkara Covid-19 No Tolerance Fortnight hman chhunga dan leh thupek kengkawhtute pui turin sorkar depart­ment-te chu an staff aṭanga 30% ruat tura tih an ni. Department hotute chu an hnuaia thawk hrisel ṭha pang­ngaite hming leh chan­chin kimchang DC (DDMA Chairman) hnenah thehlut tura tih an ni.

Manipur-a Mizo pa, V Lalhnuna (78), Salem Veng, Lamká chu nimin zing 8 vel khan Covid-19 avangin a thi. Thu dawn danin, V Lalhnuna hi Churachandpur District Hospital-ah a thi a, Covid-19 positive a ni tih hriat a nih mai loh avangin damdawi-inah ni thum vel chauh a awm hman. Covid-19 vei a nih avangin a ruang chu an inah luhpui loin thlânmualah vui a ni.

State Referral Hospital-ah nimin khan Covid-19 vei mi pakua dah luh an ni a, mi panga chhuahtir an ni thung. SRH-ah hian hripui vei vangin mi 52 enkawl mek an ni a; ICU-ah mi pathum an awm a, an zinga pakhat chu ventilator hmantir zel a nih bakah, mi dang pahnih chu oxygen pek an ni. Isolation ward-a awm mi 49 zingah ngaih­tuahawm an awm lo.

PHE engineer F Lalsanglura lehkhabu buatsaih 'Tui Ramvachal (The Water Heroes) tih chu nimin khan PHE Serchhip Division pisa tualah Serchhip District MJA president Kapliana Pachuau-in a tlangzarh.