Land pass 3,13,652 awm mek zinga 55,924 digitise tawh

Land Revenue & Settlement (LRS) minister B Lalchhanzova chuan, Mizorama land pass-te chu computer-ah dah (digitise) vek an tum thu leh, land pass 3,13,652 awm mek zinga 55,924 digitise a nih tawh thu a sawi.

B Lalchhanzova hian nimin khan e-Ram hawnna inkhawmah thu sawiin, Mizorama land pass 3,13,652 chu e-Ram portal-a thun vek an tum thu a sawi a, "Digitise tlak loh, a ram awm lo pawh a lo awm mai thei, chu'ngte chu kan ching chhuak dawn. LRS Minister ka nihna anga ka manganna ber chu, ram ka lei a, ka va zawng a, ka hmu lo tih hi a ni a, tu thiam loh nge tih hriat a har tawh ṭhin," a ti.

Mizorama land pass zawng zawng digitise vek an tum thu sawiin Revenue Minister chuan, "Tunah hian Mizorama land pass 3,13,652 awm mek zinga 55,924 kan digitise tawh a, kan digitise-te hi e-ram nen a inthlun zawm vek dawn. e-Ram portal-a land pass-te chu pass rintlak, a taka ram awm ngei a ni dawn. Empanel firm 16-te ram teh luh khawmna tur pawh e-Ram hi a ni dawn," a ti a; ram pass fel lo rang taka chinfel a nih theih nan e-Ram chu a pawimawh thu a sawi.

B Lalchhanzova chuan, e-Ram portal-a land pass-te digitise chuan a taka ram awm lote a tihbo dawn thu sawiin, "e-Ram-a kan dah luh tawhte chu a awm ngei em tih a ngai tawh dawn lo. Bank-ah pawh miin loan va pûk dawn se, bank tan awlsam takin e-Ram kaltlangin a taka awm ngei a ni tih finfiah nghal theih a ni tawh dawn a, LRS office-a kala finfiahna a ngai tawh dawn lo," a ti.

LRS MINISTER SAWI DANGTE

◆ Tun hma khan LRS department hotute leh thingtlang kilkhawra mite inkar a lo zau ṭhin a, rambuai a awm lo thei lo. Chu'ngte chu technology backup system hmang leh administration hmanga tihfel kan tum.

◆ e-Ram hi ministry hmasain bul a lo ṭan tawh a ni a, kan theih ang angin kan ûm zui a, siamṭhat ngai tam tak a la awm ang tih hre chungin kan hawng phawt a ni.

◆ Revenue thubuai tam takte rang zawka ngaihtuahtu tur Revenue Court kan siam dawn.