Kuminah dengue vei mi 437 hmu tawh

Kumin 2024 January aṭanga September thla thleng khan Mizorama dengue vei mi 437 hmuh chhuah a ni tawh a, dengue vangin mi pakhat a thi tawh.

Nimin khan Secretariat Conference Hall-ah Multisectoral Coordination Meeting on Dengue-a tarlan danin, January 1 - September 30, 2024 chhung khan Mizoramah mi 6,826 enfiah aṭangin dengue vei mi 437 hmuh chhuah a ni a; endik zat aṭangin 6.40% a ni.

Health & Family Welfare department-in district a ṭhen zingah Aizawl West district-ah dengue hmuh chhuah tam ber niin, mi 160 hmuh chhuah a ni a, a dawttu Lunglei district-ah mi 147 hmuh chhuah a ni. Siaha leh Lawngtlai district-ah mi pakhat ve ve chiah hmuh chhuah a ni thung.

Kumina dengue vei hmuh chhuah tawh mi 437 zinga mi pakhat a thi a, Aizawl West district-a mi a ni.

Nimina Multisectoral Coordination Meeting on Dengue hi State Vector Borne Disease Control Programme (SVBDCP) niin, HFW joint secretary Lalnunmawii Ralte-in a kaihruai a; Mizoram sorkara a kaihhnawih department 10 aiawhte bakah, Central YMA, Mizoram Kohhran Hruaitute Committee, Aizawl Municipal Corporation leh MHIP aiawhte an tel.

Ṭhutkhawmah hian Mizorama dengue natna hluar zel tur laka inven dan tur leh dengue ûm bo tura hmalak dan turte sawiho a ni a; Lalnunmawii Ralte-in thu a sawi bakah, National Health Mission-a mission director Dr Eric Zomawia'n Mizorama dengue dinhmun a tarlang.