A u thattu dam chhung táng turin hrem

Kum 2020-a mi thattu Lalṭhakima (34) s/o Chawnghlira, Lungmuat chu nimin khan Kolasib Fast Track Court-in thiam loh a chantir a, dam chhung táng turin a hrem.

Thu dawn danin, Lalṭhakima hian November 10, 2020 chawhnu dar 1:15 khan a u Lalrammawia (53) chu chhunah a khuma a mu lai hreipuiin a chêk a, ká chhawn lohin Lalrammawia hi a thi a ni.

Kut an inthlâk lai hi hmu tu awm lo mah se, an in chhunga pa ber thuthlengseia muzálin an thâwm hriain a harh a, khum a en chuan a fapa upa zawk chu thisen bualin a hmu a, Lalṭhakima chu hreipui kengin a hmu bawk.

Lalṭhakima hi court judge hmaa a inpuan dan chuan, a ú Lalrammawia a thah ní chawhma lamah an inhau buai a, mahse, an chenpuite'n an ṭhelh avangin an intibuai zui lo. Chawhnu herah a ú mutna lama a va kalin a ú chuan silaia kah a lo tum nia sawiin, an bul hnaia hreipui chu chuhin a chêk ta mai niin a sawi.

Lalṭhakima hi Kolasib District Jail-ah a táng mek a, dam chhunga táng turin Koalsib Fast Track Court judge R Vanlalena chuan a hrem ta a ni.