KHAWTHLIR

Thisen pe

KṬP, Bethlehem Venglai North Branch chuan nimin khan Synod Hospital tan thisen unit 24 an pe a, petute mipa 22 leh hmeichhia pahnih an ni. Serchhipa Salvation Army Youth-te pawhin nimin khan Serchhip District Hospital-ah thisen unit 10 an pe a, petute mipa pariat leh hmeichhia pahnih an ni.

Mei zu mi 4 man

Aizawl District Anti Tobacco Squad chuan nimin khan Treasury Square leh a chhehvela sorkar pisa hrang hrangah phal lohna hmuna mei zu an awm leh awm loh an endik a, dan bawhchhiaa mei zu mi pali manin, pawisa an chawitir.

CM-in kâwm

Chief minister Lalduhoma chuan nimin khan a pisaah North Eastern Council (NEC) member Longki Pongcho a kâwm a, NEC kaltlanga Mizorama hmalakna hrang hrang a sawipui. Longki Pongcho hi NEC Science & Technology Section director Tanung Jamoh-i'n a ṭawiawm a ni.

Lamp lighting

ANM School, Zemabawk chuan nimin khan an hmunah zirlaite lukhum khumtirna leh bati chhia thu tiamna hun, 5th Lamp Lighting & Capping an hmang a, Health & Family Welfare principal director Dr Vanlalsawma'n a hmanpui. Health joint director (Nursing) Lalchhanhimi kaihhruaiin Auxillary Nurse Midwifery zirlaite lukhum khumtir an ni.

SHC inthlanah  vote 59.70% tla

Sinlung Hills Council (SHC) inthlan chu nimin khan neih a ni a, vote 59.70% a tla. Vote tlate hi nizan khan chhiar nghal a ni a, zan dar 7 khan result kan hre hman lo. SHC-ah hian bial 12 a awm a, voter 23,789 awmin, mipa 11,875 leh hmeichhia 11,914 an ni. Nimina inthlanpuiah hian mi 14,202 (59.70%)-in vote an thlak a, mipa 7,271 leh hmeichhia 6,931. Vote tlak ṭhatna ber Saipum bialah 78.30% a tla a, vote tlak chhiatna ber Phuaibuangah chuan 31.94% a tla. Vote thlak zawh veleh vote thlakna ballot box-te chu constituency headquarters panpui nghal a ni a, constituency headquarters-ah ballot box a thlen kim hnuah vote chhiar ṭan a ni.