Lunglei dist-ah thla 7 chhungin nau chunga nu thi pathum an awm

Lunglei District Child Death & Maternal Death Review Committee nimina ṭhutkhawm-naah kuminah April - October thla chhungin Lunglei district-ah naupang kum nga hnuai lam thi 18 leh nau chunga nu thi pathum an awm thu tarlan a ni.

Ṭhutkhawma tarlan danin, April - October, 2024 chhungin Lunglei district-ah naupang kum nga hnuai lam thi 18 an awm a, chu'ng zinga 12 chu nausen thla khat hnuai lam an ni. Hemi hun chhung vek hian nau chunga nu thi pathum an awm.

Lunglei District Child Death & Maternal Death Review Committee ṭhutkhawm hi Lunglei additional DC James Miahlung-in a kaihruai a; Lunglei district-a Health & Family Welfare leh department danga thawk te, damdawi-in leh health centre hrang hranga thawkte leh vanduaina tawk chhungte an tel. Nausen thihna leh raicheha thihna titlem tur leh pumpelh tura hmalak dan tur sawiho a ni.

Vanduai vanga naute thihna leh nau chunga thihna a awm rualin, ṭhenkhat chu an dam loh veleha damdawi-in panpui vat loh vang te, damdawi-in panna kawnga harsatna awm vang te, duhthusama khawl leh hmanraw changtlun tawk loh vang te, nu hrisel lohna vang te, nau pai laia inenkawl ṭhat tawk loh vangte a nih thu sawi lan a ni.