Ráltlânte buhfai tur la dawng lo

Sorkar laipuiin Mizorama ráltlân awmte tana Mizoram sorkar hnena buhfai cheng vbc. 5 man a pek tur chu dawn a la ni lo.

Thu dawn danin, Food Corporation of India (FCI) hnen aṭanga buhfai lak chhuah phalna (release order) an la hmuh loh avangin Food, Civil Supplies & Consumer Affairs department hotute chuan buhfai an la chhuak thei rih lo. Buhfai sem tur metric ton 1,379 leh quintal 34 lak chhuah phalna FCI-in an la pek loh chhan chu buhfai man tur pawisa an la dawn loh vang a ni.

Home department hotute chuan hemi chungchang hi Ministry of Home Affairs (MHA) a thlen leh dawn a, MHA hnenah hian buhfai man tur pe chhuak thuai tura ngen rualin, a lak chhuah leh sem chhuah hun an bituk pawh pawtsei tura ngen a ngai dawn.

Ruahman dan chuan, buhfai hi FCI aṭangin FCSCA department-in an la chhuak ang a, Home department nen ṭangrualin district hrang hrang thuneitute hnena an mamawh dan anga sem a ni ang a, chu chu ráltlânte hnena sem leh tur a ni.

Tun dinhmunah hian Myanmar ráltlân mi 33,004 Mizoramah an awm mek a, Bangladesh aṭanga ráltlân rawn lut mi 2,014 awmin, Manipur aṭanga rawn ráltlân mi 4,200 chuang hret awm bawk anga chhût a ni.