International Nurses Day hmang

Nimin kha International Nurses Day a ni a, Mizoram hmun hrang hrangah nurse-te’n an hmang a; thupui chu ‘Nurses: A force for change: Care effective, cost effective’ tih a ni. Kumin International Nurses Day-ah hian Vanhnuaithangi, Kulikawn chuan Florence Nightingale Award a dawng.

International Nurses Day hi Aizawl Civil Hospital conference hall-ah hman a ni a, Health principal director Dr K Ropari’n a hmanpui. Health Worker School-a nurse-te leh Kulikawn damdawi-ina nurse-te pawhin Health Worker School hall-ah an hmang a ni.
RIPANS-a Department of Nursing pawhin International Nurses Day hi hmangin, hmun hrang hrangah hriselna endikna leh inzirtirna hun an hmang.
PISGAH Reformatory Centre, Thingsulthliahah dressing, health check-up leh hriselna inzirtirna hun an buatsaih a; Calvary Comprehensive School, TNT-a naupangte hnenah hriselna lam inzirtirna hun an hman bakah, toothbrush, toothpaste, sabawn, pencil, mutbu leh ei turte an pe. Zemabawk community hall-ah Zemabawk mipuite tan health check-up an nei bawk.
International Nurses Day-ah hian India President chuan India rama nurse hna thawk ṭha thlan chhuahte hnenah Florence Nightingale Award a hlan ṭhin a, niminah pawh khan Vanhnuaithangi, Kulikawn chuan Rashtrapati Bhavan-ah President Pranab Mukherjee kut aṭangin award hi a dawng a ni.
Kulikawn Branch MHIP chuan thuchhuah siamin, an member Vanhnuaithangi’n nurse chawimawina sang ber Florence Nightingale Award 2015 a dawng chu an lawmpui thu leh an chhuan thu an tarlang.
National Florence Nightingale Award hi Ministry of Health and Family Welfare-in kum 1973 aṭangin kum tin a pe a, kumina mi 35 pekte nen mi 321-in an dawng tawh a, Mizo paliin an dawng tawh. Award hian Rs. 50,000, thuchei, certificate, leh medal a keng a ni.
International Nurses Day hi ‘Lady with the Lamp’ an tih Florence Nightingale chawimawi nan a pian champha May 12-ah International Council of Nurses bultumin kum 1965 aṭangin England-ah hman ṭan a ni a; nimin khan Aizawl bakah Mizoram hmun hrang hrangah nurse-te’n International Nurses Day pualin hun an hmang a ni.