KHAWTHLIR
In saksak
Maubawk Branch YMA chuan YMA Day lo thleng tur pualin an venga hmeithai pakhat in an saksak a, nizan khan in neitu hnenah an hlan. In hi a dung ft. 20 leh a vâng ft. 15-a zauin a bang tile leh a chung rangva hmangin an sa a, ni sarih chhung an sa. In sak nan thawhlawm Rs. 29,690 leh Branch YMA sum Rs. 13,300 an hmang.
NLUP sem
Mamit district chhunga NLUP hnuaia vawk vulh thlangtu chhungkaw 114-te hnenah nimin khan vawk in sakna tur Rs. 14,450 ṭheuh leh ar vulh thlangtu chhungkaw 33 hnenah ar chaw man tur Rs. 15,000 ṭheuh pek a ni.
Delhi police
Delhi police tur Mizoram aṭangin mipa leh hmeichhia sawm ve ve lak tum a ni a, Mizoram police-in recruitment an buatsaih dawn a, district tina SP-te hnenah ngaihven theih a ni. Mipa tan kum 18-21 inkar, cm. 170-a sang, áwm cm. 81-85, pawl 12 pass nih a ngai a; hmeichhe tan kum 18-25 inkar, cm. 157-a sang leh pawl 12 pass nih a ngai bawk.
Ar vulh inzirtir
Nimin khan Champhaiah Agriculture Technology Management Agency (ATMA), Champhai Block huaihawtin ar vulhtute tan training buatsaih a ni. Training-ah hian ar vulhtute chu ar farm hmun thlan dan, a in sak dan, natna enkawl dan leh ven dante an zirtir a ni.
DoNER secretary Vijay Kumar lo zin
DoNER secretary R Vijay Kumar chu Mizorama ni thum chám turin nimin khan Aizawl a rawn thleng a, nimin tlai khan chief minister Lal Thanhawla nen an inkawm nghal a, zanah sorkar mi pawimawhte nen organic farming-a hmalak dan tur an sawiho bawk. DoNER Secretary hian vawiinah Chhingchhipa Sainik School sak mek leh Melriata power sub-station siamna tur a tlawh dawn a ni.
Thiin chhar
May 6, 2015 aṭanga a awmna chin hriat loh, Lalrinmawia (26) s/o Chhuansanga, Hlimen chu nimin chawhma lam khan Saikhamakawnah thia chhar a ni. Lalrinmawia hi Thawhṭanni aṭang khan Hlimen khawtlangin an zawng a ni.
Luiah tla hlum
Saiha Maubawka tlangval pahnih - Lalchamliana (22) s/o Zohminga leh Vabeiriapha (19) s/o Chhualai te chu May 11 tlai tlai khan Kawlchaw bul Chhimtuipui luiah chesualin an tla hlum a, an ruang hi nimin chawhma dar 10 vel khan hmuh a ni. Thu dawn danin, Lalchamliana hi tuiah a tla a, Beiriapha’n chhan a tumna lamah an pahnihin an tla dun ta a ni.