Skill development sawihonaah Rinmawia
Regional Consultation of Sub Group of Chief Ministers on Skill Development chu Thawhṭanni khan Shillong-ah an ṭhukhawm a; Mizoram CM aiawha tel Labour Employment & Industrial Training (LE&IT) minister Lalrinmawia Ralte chuan Mizoram mamawh hrang hrang a thlen.
Lalrinmawia chuan Mizorama ṭhalai hna hmu lo an tam lutuk chu harsatna lian ber pakhat a nih thu sawiin, "He harsatna hi meeting-in a ngaihtuah tur pawimawh ber a ni," a ti.
LE&IT Minister chuan meeting-ah hian, Ministry of Skill Development & Entrepreneurship hmasawnna tur leh state-te tana hlawk zawka ministry-in hma a lak dan tur rawtnate a thlen a; SDIS scheme kalpui mek ṭha lehzuala kalpui dan tura rawtna hrang hrangte leh, Mizo ṭhalaite tana Hindi thiam pawimawhna leh hmasawnna atana rawtnate a sawi lang bawk.
Meeting chairman, Punjab chief minister Parkash Singh Badal chuan, India rama ṭhalaite theihna leh thiamna chher hriam zel turin theihtawp chhuah a nih tur thu a sawi a ni.
Sub Group of Chief Ministers on Skill Development hi Planning Commission thlakna atana din NITI Aayog governing council-in February, 2015-a a din a ni.